Trallan....það sem flýgur gegnum hugann!!

Eggjahallæri...

Thu, 28 May 2009 14:22:15 GMT

Ég hefði nú ekki trúað því í desember síðastliðnum að í maí ættum við engin egg og öll egg færu jafnóðum frá okkur. Þá áttum við yfir 20 bretti af eggju og í mars áttum við 10-12 bretti. VIð bíðum spennt eftir því að ungarnir fari að verpa en það ætti að fara að gerasta á næstu tveimur vikum. Það verður mikið gaman!!
Annars allt gott að frétta - krakkarnir komin í sumarfrí úr skólanum og svona. Stefnt er á að fjölskyldan fari öll saman til Akureyrar helgina 12-14 júní þegar ég útskrifast - langt síðan að því var lofað.

Nóg í bili, trallan...

Langt síðan síðast...

Sat, 23 May 2009 22:35:48 GMT

Heil og sæl!
Nú er aldeilis langt síðan ég skrifaði síðast hérna, enda hefur verið nóg að gera hjá frúnni. Mikill tími fór í það hjá mér síðustu mánuði að skrifa lokaritgerðina mína í leikskólakennaranámi við Háskólann á Akureyri. Henni skilaði ég 30. apríl og er síðan búin að taka eitt próf og búin að fá útúr því. Nú er einungis eftir að fá einkunn fyrir lokaritgerðina og vonandi svo að mæta í útskriftina 13. júní í Íþróttahöllinni á Akureyri. Þetta er stór og góður áfangi og gaman að geta loksins sagt að maður ,,sé eitthvað"!! Með þessu er ég ekki að gera lítið úr einum eða neinum, en þetta hefur mig alla tíð langað að gera svo það má segja að gamall draumur sé að verða að veruleika. Ég reikna með að fara svo að vinna sem leikskólakennari eftir sumarfrí leikskólans Krakkakots í sumar, þ.e. ef ég fæ vinnu.

Af okkur er bara allt gott að frétta, það er allt að byrja að taka á sig eðlilega mynd hérna eftir törnina hjá húsmóðurinni. Það er reyndar ýmislegt sem á eftir að gera, eins og að hreinsa til í garðinum og taka góð þrif hér innanhúss, en ég veit það eftir þessi fjögur ár í skóla að þetta fer ekkert og þetta verður allt gert - bara spurning í hvaða röð.

Krakkarnir eru öll kát og hress. Björgvin Ingi er nýorðinn 9 ára, eins ótrúlegt og það er nú. Ég hætti aldrei að velta mér upp úr því hvað tíminn líður hratt og hversu stutt mér finnst síðan þessi elska kom í heiminn á Sjúkrahúsinu í Keflavík. Það skrítnasta í þessu er að ég er alltaf jafn ung!!!

Nú læt ég þessu lokið í bili, nú reyni ég að skrifa hér öðru hverju, kveðja til ykkar allra - trallan.

Fráfall afa!

Thu, 29 Jan 2009 14:59:30 GMT

Komið þið sæl!

Í morgun fékk ég símtal frá pabba þar sem hann tilkynnti mér að afi minn, Pétur Hafsteinn Björnsson hefði látist í gærkvöldi. Hann var fæddur í Sandgerði 21. júlí 1918 og bjó þar alla sína tíð, nema núna allra síðustu árin sem hann dvaldi á Hjúkrunarheimilinu Garðvangi í Garði. Afi minn var góður maður og það var gaman að spjalla við hann. Hans verður sárt saknað.

kveðja trallan...

Langt á milli...eins og oft áður...

Sun, 14 Dec 2008 22:30:09 GMT

Það er ekki oft sem frúin kemur orðið hérna inn, fer varla í tölvuna þessa dagana og ef hún gerir það fer tíminn að mestu í fésbókina margfrægu - en hefur þó minnkað mikið. Annars er bara allt fínt af okkur. VIð fórum suður um daginn, öll fjölskyldan. Björgvin Ingi fór í hálskirtlatöku 4. desember og við vorum í íbúð sem Ingunn systir og Andrés eiga fram á sunnudaginn 7. des., en þó fóru Birna og Valdi heim en ég og strákarnir fórum til Ingunnar og þeirra í Grindavík og vorum fram á fimmtudaginn 11. des. Það var fínt bara, það fór vel um okkur eins og búast mátti við. En eins og alltaf eftir flakk vorum við ósköp fegin að komast heim, ekki síst sjúklingurinn sjálfur. Hann er allur að koma til og ætlar að drífa sig í skólann á morgun, með nokkrum skilyrðum sem mamman ætlar að ræða við kennarana.
Við erum búin að vera aðeins að jólast hérna, setja upp jólaljós og svona. Ég bakaði svo brúna lagköku í morgun, veit ekki hvort ég baka meira. Var búin að baka sjö smákökusortir áður en ég fór og á eitthvað af tertum sem ég bakaði áður en Birna átti afmæli. Ég ætla þó að reyna að baka piparkökur með krökkunum og leyfa þeim að skreyta, en kannski ekki fyrr en um helgina....við sjáum bara til með það. Núna er bara að koma jólunum upp...skipta út skrautmunum í stofunni og svona....

Jæja, læt þetta duga í bili, bestu kveðjur til allra - trallan...

Afmæli Birnu Rósar!!

Fri, 28 Nov 2008 00:05:52 GMT

Stelpan mín er orðin 6 ára:s - þó mér finnist það meira en lítið skrítið. Hér var mikið fjör í dag...og verður síðan önnur veisla á laugardaginn. Í dag var bekkjarafmæli - og hátt í tuttugu 6 ára börn í húsinu!! En það gekk bara vel fyrir sig:d - hreint ótrúlega vel skal ég segja ykkur!!

Vildi bara segja ykkur af þessu - kveðja trallan....

Lítið skrifað....

Mon, 17 Nov 2008 09:12:32 GMT

Það hefur lítið farið fyrir skrifum hér uppá síðkastið, en það hefur nú einungis verið vegna tímaskorts. Ég hef verið að vinna að vettvangsskýrslunni minni - sem ég póstlagði svo á fimmtudaginn....og mikið var gott að klára hana og koma henni af sér!!!
Nú er bara að koma sér í lokaritgerðargírinn...fara að leita að heimildum og þessháttar!!

Bestu kveðjur frá mér í kulda og trekki...trallan...

Lítil frænka fædd!!

Sat, 08 Nov 2008 09:16:40 GMT

Í nótt kl. 4.56 eignuðust Bjössi systursonur minn og Begga litla stelpu. Ég veit ekki ennþá alveg hvað hún var stór, en hann sagði að hún væri 12 merkur....var ekki með lengdina á hreinu!!
Ég óska þeim innilega til hamingju með litla gullmolann, Patreki Ívari með litlu systur og auðvitað öllum hinum líka.

Langaði bara að segja ykkur frá þessu....kveðja trallan....

Búin í vettvangsnáminu!!

Mon, 03 Nov 2008 10:10:30 GMT

Nú er vettvangsnáminu lokið hjá mér og við tekur vinna við skýrslu sem ég þarf að skila fyrir miðjan nóvember. Hún er reyndar langt komin svo þetta kemur allt til með að hafast. Er að fara í gönguferð með litla karlinn minn - bið að heilsa núna, kv. trallan....

Sunndagur einu sinni enn....

Sun, 12 Oct 2008 09:51:08 GMT

Það er sko kominn sunnudagur enn einu sinni - vikurnar líða hver af annarri og það líður hratt á vettvangsnámið hjá mér. Það var gestkvæmt hjá okkur í gær. Valdi minn átti afmæli og að vanda áttum við með kaffinu í tilefni dagsins. Hér mættu þó nokkrir í kaffi og spjall - bara gaman!! Krakkarnir fengu sitthvora litla skúffuköku til að skreyta og svo þegar pabbi þeirra kom úr fjósinu í gærkvöldi tóku þau á móti honum með kökurnar og afmælissöng - og honum þótti þetta voða skemmtilegt. Annars prófaði ég tertuuppskrift sem ég fékk hjá Hrefnu vinkonu um daginn og hún féll í mjög góðan jarðveg hjá gestunum (og okkur að sjálfsögðu líka!!).

Annars bara allt gott - læt þetta þó duga núna - bestu kveðjur trallan.....:d

Skemmtileg helgi!!

Sun, 28 Sep 2008 11:50:57 GMT

Það er búið að vera gaman hjá okkur um helgina, því við fengum gesti sem gerist ekki mjög oft!!! Hrefna æskuvinkona mín, Sverrir og krakkarnir komu á föstudagskvöldið og fóru síðan heim í morgun. Það var svaka villibráðarveisla hér í gærkvöldi, steikt gæs og hreindýrapottréttur - ekki amalegt. Og þó að ég hafi aldrei verið mikið fyrir þennan mat fannst mér þetta rosa gott. Og félagsskapurinn skemmtilegur - sem var ekki verra!! Karlarnir skelltu sér á gæs og höfðu þó nokkrar, Hrefna fór svo smástund í skurðinn í gær - en kom heim og sagðist vera gæsafæla því það hefði ekki sést kvikindi eftir að hún kom!!

Sem sagt bara gaman hjá okkur - og næst verðum við að skreppa í Héraðið til þeirra og þá höfum við með okkur nesti til að elda þar!! Bestu kveðjur til alllra, trallan....

Allt gengur sinn vanagang!!

Thu, 18 Sep 2008 20:52:31 GMT

Það gengur allt orðið sinn vanagang hér á heimilinu, húsmóðirin komin í þann gír að geta verið dugleg að þvo og svona þó að hún sé mikið útaf heimilinu. Þetta er bara spurning um skipulag held ég - þó að það sé nú reyndar ekki mín sterkasta hlið!!!

Ég veit að það er ekki of seint að fara í ber - en ég bara kemst það ekki. Er búin að ætla að fara -, en það eru bara önnur verkefni sem ég þarf að sinna um helgar - sem væri eini tíminn fyrir mig. Pabbi reyndar tíndi aðeins krækiber handa mér á Stöðvarfirði um síðustu helgi - svo ég gat búið til krækiberjahlaup úr bestu krækiberjum í heimi!!! Ég var voðalega ánægð með þetta, en þetta hefði alveg mátt vera pínu meira!! Ég geri bara meira á næsta ári - því ég ætla að gera allt á næsta ári!!!

Það gengur bara vel á Lönguhólum, en ég verð þó fegin í næstu viku þegar viðvera á hverjum degi styttist úr 7 tímum í 5!! Það verður mikið betra að geta tekið á móti krökkunum hérna heima þegar þau koma úr skólanum og svona.

Afmæli síðsutu daga áttu pabbi minn sem varð 71 árs í fyrradag - Árni Valtýr (sem ég gleymdi síðast) varð 1 árs 10 sept - Fanney nafna mín varð 79 ára þann 14. september. Innilega hamingjuóskir til þeirra allra - og annarra afmælisbarna sem þetta sjá
Læt þessu lokið í bili, bestu kveðjur - trallan

Fannst tími til kominn!!

Sat, 13 Sep 2008 10:11:04 GMT

Birki Guðna fannst tími til kominn þegar hann var orðin 1 árs að drífa sig í að byrja að labba. Það má segja að það hafi endanlega komið á sunnudaginn - 7. september. Og síðan hafa menn ekki stoppað og labba um allt. Stundum finnst honum þó fljótlegra að skella sér á hnén og skríða - enda menn í meiri æfingu við það.

Þessa dagana hugsa ég svo mikið um hvað ég vildi að ég hefði komist í berjamó til að tína mér nokkur kíló af krækiberjum - mig langar svo að búa til hlaup. En svona er þetta - maður getur víst ekki verið á mörgum stöðum í einu.

Þann 11. september s.l. átti ein góð frænka afmæli - og það er hún Sigga (litla frænka mín) eða Inga Nína Sigríður Jóhannsdóttir. Og viti menn hún er orðinn 29 ára - eins ótrúlegt og það er nú....en ég veit að hún er 7 árum yngri en ég svo.....

Læt þessu lokið núna - bestu kveðjur til ykkar allra - og ekki gleyma að kvitta! Trallan...

Já, tíminn flýgur áfram!!

Sun, 07 Sep 2008 10:22:40 GMT

Tíminn flýgur alveg áfram - það er sko alveg á hreinu. Í fyrradag, eða þann 5. september átti Birkir Guðni afmæli - hann er sem sagt orðinn 1 árs litli kappinn!! Og ég er enn að átta mig á því - hann sem er nýfæddur...en það er svo sem ekkert nýtt að mér finnist tíminn líða hratt, enda er ég alltaf að tala um það (og allir orðnir leiðir á því). Við áttum góðan dag eftir að við komum heim á föstudaginn, hingað komu góðir gesti með góðar gjafir handa afmælisbarninu litla sem naut sín útí ystu æsar og dansaði fyrir alla viðstadda eins og herforingi!!!

Í gær átti svo góður maður afmæli, hann Jói ,,minn" Jóhanns - maðurinn hennar Guðnýjar föðursystur minnar fyrir ykkur sem ekki þekkið til. Hann náði þeim áfanga að verða sextugur, en er þrátt fyrir það alltaf síungur og skemmtilegur. Þau komu hér við á föstudaginn á leið suður á Klaustur þar sem þau voru ásamt krökkunum sínum og þeirra fjölskyldum saman á þessum tímamótum. Ég vonast til að hitta þau svo aftur í dag þegar þau verða á leið heim aftur. En fyrir þá sem ekki vita eru þessi hjón mikið uppáhaldsfólk hjá mér - bæði tvö og ég hef aldrei litið á Jóa sem neitt minni frænda minn heldur en Guðnýju frænku mína!!

Annars er bara allt ágætt, hér er eitthvað kvef í gangi - mamman og börnin hafa náð sér í haustkvef ársins....vonum að það verði ekki neitt meira en það - biðjum að heilsa í bili trallan...

Gengur bara vel!!

Wed, 27 Aug 2008 16:44:03 GMT

Það gengur bara vel hjá mér í vettvangsnáminu á Lönguhólum. Ég er svona að reyna að fylgjast með og komast inní starfið hjá þeim. Þarf ekki að hafa mikið fyrir að kynnast starfsfólkinu, þetta eru flestallt konur sem ég þekki og margar hverjar voru þarna þegar börnin mín voru þar. Mér líst vel á þetta og vona bara að allt komi til með að smella svona vel saman áfram....kveðja trallan....:)

Börnin farin í skólann!!!

Mon, 25 Aug 2008 14:03:10 GMT

Já, börnin eru farin í skólann - og það er skrítið að segja börnin en ekki bara barnið eða Björgvin. Birna Rós fór sem sagt í fyrsta skipti í skólann í morgun og var ekki alveg laust við að hún væri dálítið spennt, stelpuskottið mitt!! Mér finnst ekki vera svona langt síðan hún kom í heiminn hérna á Heilsugæslustöðinni þessi elska, en svona er tíminn fljótur að líða. Stóri bróðir fór ægilega grobbinn með henni í morgun (og ég reyndar labbaði með þeim) á stoppistöðina. Það voru að sjálfsögðu teknar myndir eins og vera ber þegar fólk er að byrja í skóla og eru þær komnar inná síðu þeirra systkinanna inni á barnaland.is, bbb.barnaland.is.
Annars er bara allt gott, ég er að byrja í vettvangsnámi í fyrramálið á Lönguhólum. Ég á reyndar að mæta á fund á eftir og það byrjar vel....ég veit ekki hvað ég geri við krakkana!!! En það hlýtur að reddast....
Bestu kveðjur í bili, trallan...